Canada Zin Report

A hmasain ka zin report chhiartu zawng zawngte chibai ka buk a che u.

7th Education International World Congress,21st-26th July,2015,Canada khawpui Ottawa  a ka tel ve thei mai hi ropui ka ti hle mai. Keini Mizoram Primary Teachers Association(MPTA) hi  he Congress programme tihlawhtling tuah kan tang ang tih reng ka lo ngaihtuah pha ngai lo. MPTA hian All India Primary Teachers Federation(AIPTF)  kan thlunzawm a, Education International(EI) a inthlunzawm zelin World Congress ah hian kan tel thei aa,Mizoramah he pawl zawm awmchhun kan ni a, keipawh hi he pawl member kan nih avanga tel thei ka lo ni.
Thla ruk hmalamah tawh khan Ottawa kal tura min rawn  thlan ve avangin ka Passport leh Visa te,thil tul dang tam tak chingfel tura tihna lehkha ka dawng a,MPTA hruaitu ten min phalsak angin ka buaipui nasa in, tihtur a lo tam hle a ni. 

Ka Visa dilna leh ka Bank Account Statement a khat tawkin thehluh tur thu an rawn sawi a, a thar tum thum lai ka thehlut, kar hnih vel chiah a la awm tih khan ka Bank Statement bawk chu thawn turin min ti leh a,chutih rual chuan ka Visa a fel thu min rawn hrilh ta a,mi 16 kal tur nia an rawn sawi chu reject a tam avangin mi 7 (2 female & 5 male) chauh kan nih tur thu min rawn hrilh chiangin tain, AIPTF Office a in report hun tur  min  rawn hrilh thei ta a, lawm awm ka tih rualin ka huphurh ru leh si em em a,ka thulh leh dawn chuan hmalakna kal thui tawhziate, a tluanga ka tang zel chu Lalpa remruat a nih ring bawk siin phur takin ka inbuatsaih ta a, zing tawngtai inkhawmah te,kohhran hmeichhe inkhawmahte, chhung inkhawm leh ka thawhnaah te tawngtaisak ka dil zel a. Ka kalpui tura amin rawn hrih ho lah chu biak theih a lawi an awm lova, engang mi tak ni hlawm ang maw tiin ka inngaihtuah nasa khawp mai.Kerala,Karnataka,Tamil Nadu,Orissa,Uttarakhand leh Mizoram atangin mi pakhat theuh chu a tluangah kan tang tih thu ka hre chiang ta a,email hmangin kanindawr ta zak zak mai a ni.

Ni 18.7.2015 (inrinni) tlaiah chuan Air India in Delhi ka thlawk thla ta a,Mizoram House Vasant Vihar ah AC room nuam tak mai Room No 205 ah Asst.L.O.Pu Lalhmingthangan min lo reserve sak a, ka lawmin ka thla a muang ngei mai.
 
Ni 19.7.2015 Pathianni 10am ah tawngtai inkhawmah telin ka zinkawng leh hmabak thil awmte report nualin tawngtaipui turin ka inthawh a. Pu Hminga hian MPTA a hmuh dan leh kan thawhhona tha tak maite, India ram pumpuia Primary Zirtirtu inzawmkhawm pawl hmalakna te a hriat ang ang sawi belhin he mi tuka tawngtai inkhawma telho pawh chuan kan ban hnuin min chibai nak nak mai. Delhi Mizoram House a thawkten MPTA min lo duhsak thiam thinzia chu kan hruaitu hmasa te pawn an lo sawi tawh thin a,kei pawh hian a takin ka tawng ve zel a ni. Chawhnu dar 3 ah inkhawm naah ka tel leh a, thusawi a thain kan zai hlim hle mai a, kan zaihote ka lo record a, item hrang hrang te kha lungtilengtu,hriat reng tur  an lo ni ta reng mai.

Ni 20.7.2015 (thawhtan) 9am ah chuan Shikshak Bhavan(Teachers Inn) Janakpuri ka pan ta a. Zin turte an lo thleng kim tawh a. Money Exchange an lo buaipui tan mek a,thawktu ten min lo welcome em em mai a, ka zamna a reh ta huai nghe nghe. Ka sum neih ang angte kan han chingfel ve nghal a,hriat ngai loh zirtirtu ho nen chuan kan inzui tan ta a ni.Room 202 Ac ah Mrs Suchitra Das, Orissa nen min dah, he  nu hi a fel fu mai a,lunch te nei dun in kan inkawm thei ta zek a,kei aia naupang deuh hret a ni. Zan dar11 a lo rik chuan Airport pan turin kan chhuak ta a ni.

21.7.2015 (Tuesday) 2.20am ah Canada pan tura kan han inbuatsaih vel chu lungte pawh a chhe rum rum thei alawm le,ka inngaihtuah nasa mai. Mahse Lalpa min hruaina ropui tak chu cancel ka tum lo. Lufthansa thlawhna lian lutukah thlawk tur a Secutiry checkte kan han ti a, ka kalpui tur vaiho ho chu an intihrang tan ta nghal a, ka tawngtai sauh sauh reng mai a ni. In line dawnin  min hnawl deuh reuh  thin a. Keilah Hruaitu ropuiiin min hruai tih hriain chuh miah lovin seat nuam tak ka chang nelh zel maite kha mak ka ti thin.

Kan han thlawk tan ta,ropui ka ti,Air Hostess nalh tak tak make up pawh hmang ve lo,hlim sang mai,hawihawm em em mai an rawn pheta suau suau mai mawle..an tawng lah chu hriat a nuam bawk si,ka phur ru ta viau zel a. 8hrs kan thlawk  tawh tih ah chuan Frankfurt,German ah kan tum dawn ta,ka vedio ka phawrh ve chhen a.ka sana a 11.50am a nih laiin he Airport-ah chuan 8.20am ah kan tum ta a ni.Ottawa pan turin thlawhna thlak a ni a.Air Canada in Ottawa chu ka sana 1.15pm ah kan thlawk leh ta a. Seat nuam takah keimah chauh ka chang leh ta nalh mai,ka thiante chu thlawhna hnung berah an thu khawm raih a, a mak lo ti ru,ringlo mi vek an ni a,an pathian aiin ka Pathian chu a chak zawk tlat a lawm.

21.7.2015 (ka sana a 6.40pm  a nih lain 9.10am Canada sana)  8hrs vel kan thlawh hnuin Ottawa ,Canada Airport tum ta. Airportah  chuan EI thawktute, mikhual lo hmuaktu an lo awm thap a, a hahdamthlak teh asin.. Pitar/putar an lo ding thap,an va duhawmin an ve zahawm teh reng em. Tichuan Bus nalh leh fai tawkin kan thlenna Hotel tura an lo ruatlawkah min hruai ta ani. Hotel lian leh sang em em mai,lar tak,a hming kan hre fo tawh ngei ang, NOVOTEL 5 Star ngei maiah chuan min nghat ta.kan room tur 10th floorah lift chuan min hruai a,thiani nen chuan kan indah fel a, a lawmawm duh khawp mai. Kan inkhawmpuina hmun tur Ottawa Convention Centre lam chu kein kan pan a. Congress palaite thil mamawh turte min lo pek fel hnuin Centre chu kan lut a, Delegates seat an ruatah kan thu ta vang mai, Programme tan nghal a ni a, an culture lam leh hlate an ti nghal a, big screen a en theihin an siam a, a ropui hle. 

National Contact Person Pi Sulbha Donde, AIPTF Secretary General Mr Kamalakant Tripathy te an lo thu dun a, min lo welcome a ni, anni hi AIPTF Rampal Singh nen kan thlen hma ni 2 ah an lo zu thleng tawh a ni. Pi Donde chuan min kova, min chibai pahin a bula thu turin min ti a. AIPTF Election, 4th July,2015 a Kanchipuram,Tamil Nadu a kan tello pawi a tih thu leh, Office Bearer tura min telh tho thu leh State dangin an chuh nasat thute,AIPTF Election,Tamil Nadu a a neihah th min lo hrilh nghal a,mak ka tiin a ngaihna ka hrelo chu min en reng a, i lawmlo em ni,i thiante an lawm loh i ring em ni,min ti a,kei chuan mak ka ti em a, ka inbeisei pha lo a ni tiin ka chhang a,ka note buah OB ho chu han ziak teh ka ti a, lawmthu ka sawi pahin MPTA chu kan lawm khawp ang,ka thawhpuite,ka chhungte pawh an lawm ang,mahse keimah hi ka tlinglo,engmah ka thiam lo asin,ka tih chuan,ka awm alawm,i sister angin min ngai rawh,back up ka mamawh a, nangpawh i tan theihtawp ka chhuah zel ang, tiin min han hrilh mai chu,ka hnuk a ulh rum rum mai. Office Bearer tur te chu a ziak chhuak a, Organising Secretary  tura min ziah sak chu lehkha ka dawn meuh chuan Internal Auditor tur ka lo ni reng zawk a, a hresual nge,min hriatthiam vanga an siam rem tih pawh ka zawt duh tawh bik lo.

Ni khatna progamme tarlang ang a,a thui deuh avangin a dang chu Pendrive in kawl mai ang aw.
21st July, 2015 – 9:00am - Audiovisual & Cultural presentation,welcome & introduction,cultural show  te hi darker chanve chhungin zawh vek a ni,an entawn tlak hle. Obituary,adoption of agenda, appointment of election comt, appointment of resolutions comt and adoption.

Thunawi tlem

Vaiho thu thua awm vel ta chu breakfast eina kan han zawng tak tak mai a,a to an tia, an kalsawn zel bawk si,kan teirei teh asin,kan eizawh meuh chuan an lo tan daih tawh mawle..thinrim bawk,nuihsathlak bawk si, thiante nen a nuih tlawrh tlawrh a chakawm thin..kan va inang lo tak em.. Lunch eina kan han zawng leh tak tak mai chu..nui ru nasa,a tawpah Indian Palace ah ngei mai chuan kan lut fuh ta,an han hlim em em khawp a,hemi tum  bak chu arrange fel tak hnuaia ei leh in kan ni.

Electric plug an hman reng reng kha a sin chi vek, a mil kan neilo vek chu lei tur kan zawngchiam a, ka hmuh chhun ka zawh lah chu 5dollar=Rs 260/-vel a lo nia,to an ti lutuk,min kalsan leh daih thin a,in duh lo em ni,kei chuan ka mamawh ka lei dawn ka tia, ka lei,an lo mamawh hle chu an lo lei ngamlo,an inchuh tar eng mai,,ka hau vel mawle.,an inthlahrung lo rapthlak. Heng ka kalpui vaiho vang hian ka duh angin ka vedio pawh ka hmang tangkai thei lo a ni.Chawhnu her hretah Lady Dive an ti a,Bus in sightseeing min neihpui a,a nuam hle. Dil pakhatah min hruai a,chutah chuan chu Bus chuan kan lut a,lawng lian tak a lo ni reng mai nia..
Nitin an programme tan hmain kan thleng hman lo deuh ziah,ei an duh lutuk a ka thiante hian,tlai an pawi ti lo. Congress ah hian engkim a felfai em em vek mai,kan thurel leh ngaihthlakte hi tum khatah sawi vek sen a ni love.

Ram hrang hrang 27 atangin kal khawm a niin palai 1500 tura ngaih kan ni. Amaherawh chu Visa fel lo,reject an awm nual avangin kan tling ta lova,khawvel pum huapa tel theia ka awm chu ropui ka ti takzet a,tupawh mai ka lakah an tha vek mai a ni.Asia Pacific Regional Conference Jakarta & Bangkok ka kal ve tawh na atanga inhre tawh mi engemaw zat kan han inhmu leh chu kan inchibai ve lawp lawp mai.
Canadian Teachers Federation nen kan inthlurbing deuh bik a,MPTA a Joyful learning training min rawn pek tum kum 2007 te ka sawichhuak a, Leaflet,key chain leh kan hnam thil eng eng emaw ka ken ruk reuh reuh chu ka pe a, an hlim thiam hle a,thla kan la ho nasa mai,lo lakal leh ngei turin ka sawm a, an lawm thiam hle.

24.7.2015 tlaiah chuan Ottawa chhuahsanin Montreal thlawkturin kan chhuak ta. Air Canada thlawhnain Montreal chu kan pan ta a,darkar chanve lekah Montreal chu kan tum ta der mai. (3.40pm a kan tum lai hian kan khuaah chuan a tuk 25.7.2015 zing 1.30am a lo ni ve mek)Montreal a Downtown Hotel nuam leh changkang tak maiah chuan min hruai a,a lawmawm duh khawp mai. Hotel bul velah kan han k al kual a,a va sap ram tak tih tur hi a ni ber e, a faiin a va nuam tak em.China Town ahte kalin kan han kual thuak thuak a,thla  ka la kual vel deuh reng. Ei leh in pawh ticket pek vek zel angin mumal takin tlai takin kan ei zel a ni.
 
25.7.2015 9am ah chuan Bus nuam leh nalh,fai takah chuan  sightseeing nei turin min hruaichhuak leh ta a,Montreal khawchhung min fanpuiin,sap takin hmun hlui leh ropui tak takmin enpui a, fakawm ka tih em em chu Bus driver kum 50 vel mi chu  tourist guide a ni nghal a, a khalh bawk a, a sawi pah reng bawk,bus tiding min hrilh kual a duhin mike hmangin a ding chhuak mai zel kha a fakawm thlawt ka ti. Bus atanga chhuka kea fankual ngai deuh lai a awm pawhin innghah chhung tur hun a ruat a, chuta thleng hman tur chuan kan inbuatsaih zung zung zel a, tar lam an tam thei sia,mahse hnufual an awm ngai hauh lo,tupawh mai hian kekawr bul hain sneakers an bun a, sunglasses an bun bawk, kal vawk vawk vek mai.

26.7.2015 chhunah chuan Toronto pan turin Air Canada ah kan thu leh ta vang mai. Darkar khat kan thlawh hnu chuan kan tum leh ta a,Bus nuam takah Hotel Fairfield, 5star bawkah changkangleh nuam tawkah min hruai leh ta a, he hotel hi Sap rama kan hotel awmna hnuhnung ber a ni dawn ta a ni. 11th floor ah lift in min dah leh ta a, a hlimawm duh khawp mai (ka thiante leh an hawi vel mai mai hian ka hria a, ropui ti awm pawn an lang ve der lo, an kal vawikhatna ve tho a ni vek si), Toronto khawpui chu kan awmna atangin a lang pe uar mai a, a mawiin a ropui a ni. Whatsapp hmangin thawhpuite leh chhungte ka be kual vel a,mitthlaah kan awmna inhlatzia ka chhui a,Pathian ropuizia ka hmu tel zel a ni.

27.7.2015 ah chuan sight seing min neihpui turin Bus in min hruai leh ta a. Toronto khua min fanpui,sap tak a ni.Niagara Falls en dan kawng hrang hrang an duan zingah a duh tan tiin passenger 6 chuan theihna Bell 407  Helicopters atanga en duh zingah ka inpe ve a,a duh tan dollar 111(Rs 5000)in 15mins chhung Toronto chungah kan thlawk kual a, Niagara Water Falls chung zawnah,Canadian Horseshoe Falls,khawvelhmun dang in a neih ve loh en a kan han bir deuh chu ropui duh khawp mai,vedio cover ka duhna lamah hlauhawm ka rin pawh ka hre pha tawh lo,hlimawm ka ti takzet a ni. Helocopters hi 5 lai ka hmu a,kan thlawk nuk nuk niin ka hria,kan tum hnu chuan kan thlawh dawna thla min laksak chu lei theihin an lo peih hman vek a,to pawh sawi theih tawh loh,kan lei nghal zung zung mai,(sum a va lut hnem dawn em ka ti rilru a)chuan Flight Certificate min han hlan zui a, lawmawm ve duh . Hemi hmun panna kawng hi Canadian Touism Commission’s Experience te winery hmunpui a ni a( Niagara Fruit Belt 15,000 acres of grapes and over 90 wineries).Water Falls en theihna hi thil hrang hrangin an siam a. Hotel lian leh sang takah, ei man pawh to takah min han hruai phawt a, lawng lian,chawn lian tak takin a hmuna en theih a nil eh a, keipawh chu kan chuang ve leh ngei a,ropui ka va tiin an va ti ropui thiam tak,lawnga chuang tur hian ruahmanna  a fel hle a, mi tam tak en tur kal zingah han innek buai pawh awm lovin a fel vel thlap thei kha mak ka ti khawp mai. a duh tan thlalak theihna hmun rem em em an siam a,lunch neih zawhah Bus route in kan tlankual leh vek a, hlimawm takzet.
Hnam changkangte hian ngaihhlut tur dik an ngai hlu thiam hi entawn tlak ka ti.  Water Falls hmanga Pathian ropuizia lo lang chhuak hi a siam mihringten an va ngaihlu thiam em,ropui ka ti. Pathian thilsiam ropui tak takte,a ropuizia hre tura hmala tur duhtaka a siam mihringte kan ni asin tiin ka inngaihtuah nasa mai.

28.7.2015 chawhmaah kan kalpui zingami thianpa in a motor in min rawn lam a, bazaar min hruai a,ato thei lutuk (thil ka hawn mumal thei lo che u, ka thiante an phakar tlat) Baskarana, Tamil Nadu mi hian kan State chanchin min zawt peih a, kan inkawm ngei phian, hei hian min tanpui peih ber, midang chu anmahniho chiah an inngaihtuah. Tlai ah chuan Toronto atangin Montreal a thlawk leh turin kan chhuak leh ta a. Hetah hian thlawhna pahniha kan kal a ngaih tak thu leh, Montreal atanga thlawhna inanga thlawk tur kan ni a, pakhat ka hovin, pakhat Suchitra-i hovin kan inthen ta a, (ka ho kan tluang zawk) Montreal kan han tum tur chu Montreal tourist guide in a chanchin a sawi lawk vek a, tha hlein ka hria.

29.7.2015 ah Lufthansa Air bawk chuan Munich(Munchen),Germana tum turin Canada kan bye bye dawn ta.4.40pm ah thlawk tannin Munich chu 10.45pm ah kan tum leh ta,Canada leh Munich hi 7hrs in sana a inthlau a ni.Munich thlawhna tum hmun chu ropui ka tih ber zing a mi a ni. Munich atang chuan zan dar 7 ah thlawk in Indira Gandhi International Airport,New Delhi chu darkar 8 hnuah kan tum leh ta a,air traffic jam avangin kan tum fel har ngang mai,kan han tum chiah chu a riin Pathian hnenah lawmthu sawiin ka tawngtai mawlh mawlh mai a ni. Kan pawisa ken ang angte exchange kan han tih fell eh hnu chuan kan thiani chu a bag a rawn thlengve ta lo,a tap teuh mai bawk si,kalsan ka duh tabik lova, Mizoram House pan bik lovin Shikshak Bhavan lamah kan haw ho leh ta dial dial zawk a,inthen dawn a ruaiah kan buaipui ta zek a. Ni 30.7.2015 2pm ah Orissa panin tap teuh chungin a bag tellovin min hawsan ta a,kei chu khawhar takin ka roomah chuan ka inkhung ve thung a,ka fim khur avangin pawnah ka chhuak tha duh lo,breakfast,lunch leh dinner ei chhung ka chhuak zawk tih mail oh chu. Tichuan kan thiante South India lam thlawk turte nen Airport panin 4am ah Bhavan chu kan chhuahsan ta a ni. Ka thiante chu domestic a kal tur an lo ni leh zel a, kei chu International airport panin ka kal leh ta a ni. Airport ah hian Mizo nula kan veng ami Korea a NGO Meeting a han tel nen kan han intawng nawlh mai chu mak ka ti leh pek a, ka lawm em em mai a, Lalpa hruainaah lawmawm ka va ti em.

Awle, ziah tur tam tak a awm thei nain duhtawk mai ila. Ka hun tawn te ka chhui neuh neuh a,Pathian hian a ropuizia min hmuhtir a duh a ni tiin ka inhlan a. Hetiangah hian ka zin thei ang tih reng reng ka la ngaihtuah chin ngai lo. Zonu ve mai ka ni. Mahse Lalpa ropuizia tarlang theihna turin hmanrua a va tam em ka ti.. Sum tul ang angte mahni intum tur a nih avangin ka inbuatsaih ru ve nasa mai,tul zawng zawng ka tihna kawngah,” Lalpa,i remruat anih chuan tluang takin thil kal se,anih loh pawhin min hriattir ang che.” tiin ka inhlan a,a remruatna hnuai tih loh theih lohin EI lamte,AIPTF, MPTA hruaitute, Mizoram Sorkar leh Department hotute, Chhungkua, Khawtlang, ka eizawnna kawngahte, Kohhranahte, engkimah ka kal theihna turah  hian harsatna min siamtu an awm lova, a kaltluang em em mai a ni. Tawngtaisakna ka ngen angin min tawngtaisaktu an va tam em,"Ka lawm e, Lalpa" ka ti reng mai a ni.
Sawi tur leh sawi chak tam mahse,duhtawk phawt mai ila

Tin, AIPTF Office Bearer tur mi 24 thlanchhuah zinga ka tel leh zelte hi mak ka ti a. Phat mai ka duh rum rum a ni, ka thiam leh theihna a tlem si avangin,mahse MPTA a lo ropui zawk zel beiseinain ka pha ta rih lo chu a ni a. MPTA hnuaia thil thleng leh chang ka nih avang hian  a thuchhuak chauha thil thleng thei ani tih hriain a zai ka ngai ta zawk a ni. Thian tha tak tak,thawhpuite avangin chawisan leh chawimawiin ka awm ani tih ka inhria a,lawmthu ka sawi a ni. Keimaa thiltithei Lalpa chuan hna a thawk a, heng chanvo te hi chelh a, ti thei ve leh mai bawk thin chauh ka ni. Lalpa lo ropui zual zel rawh se tiin a chhiartu zawng zawngte ka ngen a che u.