Zirtirtute hi Kan Ram Siamtu leh Missionary Kan Nih Theih Zia

Also on Zirtirtu Thian (January - March,
2014)

Zirtirtu hna hi Missionary hna a nih theih zia leh ram siamna dinhmun pawimawh tak chelhtu kan nihna hian min luah khat ve em avang leh ka hna tuina tak anih avangin kan chhimthal bekang puah ve phawng mai a ni.

Kum 1991 ah khan Bethel hmunah ‘Naupangte ka hnena hruai thleng turin kumtin naupang za rual ka pe che alawm’ tiin an thlarau lam nun pawimawhna leh zirtirtu hna hi missionary hna a nih theih zia te, ram siam turin tisa leh thlarau dinhmun pawimawh tak luahtu kan nih ziate min hmuhtir a. Missionary ten hmun ralti leh khawlum leh thosi karah mahni in leh lo chhuahsanin an thawk a, keini erawh chu mahni ramah missionary hna kan thawk a ni.

Ka phak ang tawk tawka thahnemngaiin ka thawk ve a, ka theih tawpa ka thawh pawhin mite ka tluk loh zia ka hria a, chuti chung chuan chauh changte awm thin mahse Thuhriltu 12:1 “I vanglai hian i siamtu chu hrereng ang che. Hun tha lo, tarchhiat hun, ‘Dam pawh nuam ka ti tawh lo’ i tih hma hian,” tih thu hian chakna min siamthar leh thin a. Chawhnu tlai lama inthlahdah ka chak deuh niin Thuhriltu 11:6 “Zingah buhtuh la, tlaiah pawh tuh rawh. A to that vek dawn leh dawn lo i hre si lo. Zinga tuh nge tha tlaia tuh i hre hek lo” a tih thu hian tha thar min siam leh thin. Working hour bak ka thawh pawha ka chenpui chhungkuain min dal hauh lova min tuipuina leh naupang hmasawnna thar hian HLIMNA min siam fo thin. Kan ngaih pawimawh thin chu mahni hnathawhna inpumpek tak takna leh angkhata naupang enkawl hi a ni.

A remchan dan ang zelin, naupangte an khawvel ni a kin hunah pawh Lalpa hnen an thlen theihna tura chhandamna thute, Bible chang by heart leh Zaipui te, Drill etc tihpui te, class tina naupang zirna thiante rualpawl phaklo te tana an hming lam diat diata tawngtaisakna neih thinte, naupangte tan malsawmna ka nih theihna tura tawngtaina hman thinte, ka theih tawk tlem hle mahse nuam ti leh lawm tak leh phur taka hma ka lo lak ve mek laiin, khawvel finna lo sang zelah, Mizoram State Education Department pawhin zirna tha leh changkang zawk a neih theih nan ruahmanna fel tak a siam a. Dt. 10.2.2010 (11:00AM) ah Kolasib SDEO Office ah min kokhawm a. Kan thiamna hi mahni thawhna stage mil ni turin kum 3 chhunga Class XII passed tura sorkar hmalakna in min duh thu leh Voluntary Retirement Scheme (VRS) a pension dil duh tan mimal duhthlanna ngei anih thute chiang takin min lo hrilh a. Zirchian lehzualna turin a sawifiahna leaflet min pe bawk a.

In ka haw chu ka in ngaihtuah buai hle a, ‘Computer age ah kan awm tawh a, chumi upto date tura Class XII passed tura ka zir zawm thei dawn lo anih chuan, sorkar duhdan zawmna VRS pension dil mai hi Pathian thu ani angem? Nge, dil lo ta ila kan ram zirna tithanthutu ka ni zawk a ngem? Pathianin a rawngbawl hna min pek ka tihtawp chuan a pawisawi ka ni angem? tiin keimah leh keimah ka inzawt ta a. Joba 1:21 “Lalpa’n a pe a, Lalpa’n a la leh ta” tih chu min chhanna a ni. ‘Lalpa nangma anpuia i siam ka mihringpuite tana malsawmna nih ka duh’ ka ti a. Kristian hla bu No.325 ‘Lamlianah leh daiah te chhuak rawh’ tih chu min chhanna niin (Lamlian leh dai chu Lal Isua la neilo te an ni) tih min hrilh a. Tlai khat ka school bang eirawng ka bawl pah chuan pension turin ka indah chhin a, ka ui leh lungleng chu tahchhuak teuhin ka duhthlanna tihlal ka tum nasat hle lai chuan, Genesis 12:1 “Ram ka la entir tur che lamah chuan kal rawh’ tih thu chuan felfai takin a rawn lan leh ta hmiah mai a. Mahse thutlukna siam har ka la ti cheu a, kan pa (H. Lalrintluanga) chuan, ‘Duhthlanna a ni a, i ngaihdan dan a ni mai’ a ti thin a. Ka mangang chu ka tawngtai a. ‘Lalpa, ka pathian i ni a. ka pasal pathian i ni a, hmeichhe lu chu mipa a ni a, mipa lu chu Krista a ni.Chuvangin ka pasal thinlungah thutlukna min siam rawh, min chhanna chu i thu ah ka pawm ang’ ka ti a. A hnu a kan pa ka zawh leh chuan, Dil mai a tha ang’ a ti a. Lalpa rawn si a ka duhthlanna ka tih lai chuan Pathian bia a ka tawngtaite, Bible ka chhiar thin ten awmzia a nei lo anga, ka Pathian chu ka tan engmah loah ka chantir dawn a ni si a, chuvangin ka zawm lo thei tawh lo. Tichuan pension dilna chu ka han tifel ve ta a.

Tukkhat chu vartianah ka harh a, lunglenga mittui sur zung zunga ka awm lai chuan thawklehkhatah Sam 26:6 ‘Tap chungin buh chi fehchhuahpui mahsela, an buhphalte kengin hlim takin an lo haw leh ang’ tih hian a rawn lang leh hmiah mai a. Ka mittui chu a tla leh ta a ni.

ka hunliam tawh te ka thlir kir a, ka rawngbawlna turin ziritirtu hna zahawm tak min pe in, ka thawh hunchhung zawng zawngah chakna leh theihna zawng zawnga thawk thei tura hriselna leh missonary hna a ni tih min hriatfiah tirtu Pathian hnenah lawmthu ka sawi a ni.

Ka testimony ka rawn ziah atang hian ka zirtirtu pui, thiamna leh finna ngah zawk hun hlu tak leh rei zawk la neite, mi pahnih khat talin kan zoram siamtha theitu leh missionary in nih theihzia in lo hriatphah hlauh chuan ka pension hi a va hlawk dawn em! Pathian chu fakawmin awm rawh se.

Ka lawm e.

Author
Lalthahmuaki

Teacher

1987
-2010
Govt. Saizika Primary School, Kolasib, Mizoram