Nu leh Pa te Pawh Hi (ka khualzin naah chuan.......)

He ka thu ziah tur hian a zawng zawng chu a huam lo tih ka chiang a, a huam chin erawh an thahnem hle tih erawh ka hria.

 

“Khawi atanga lo kal nge i nih? ti a ka hmaa ding palian leh sa tha nulh mai zawhna chuan ka thinlung chu a nghawr dawt . Tumkhat chu pa pakhat hian a fanu tleirawl hi alo vua a, a vuak pah chuan an hla tuihnai lo zet mai, “Ka fanu pawh i ni nek lo ang nang ve hi! Min zahna reng reng nei lova i nunphung thlak i tum loh reng mai chu ni? Hetianga hmeichhe lerh leh mipa hre lutuk hian ka fanu nih i phu thlawt lo. He ka in hi chhuahsan la i duh angin va tal khawlo la, i duh leh va inzuar rawh,” tiin alo chham piap piap mai a.

 

Chutianga a fanu vuaa thu chhe tinrenga an khumtu Pa chuan a fanu kut a thlak lai chuan zu a rui tih a hriat hle lehnghal a. Zurui ni lo sela, khatianga a fa kha a tihduhin ka ring lo. Mahse, a lo ti duh ve khiat mai thei bawk a.

 

Ka ngaihdan te te chuan, “Pa a nihna zahawm tak a humhim zawh loh avanga a thusawi pawh a fanu ngeiin a zahsak zo lo mai zawk lo’ng maw aw!? A chenpuite bulah meuh pawha a zahawmna a hloh tawh chuan a thenawm khawvengte zah a va kai mai awm lo em!?” ka ti rauh rauh a. Mahse, chumi rual chuan ka rilru ngaihtuahna chu a rawn inhnial nghal pang mai bawk a, “Eng anga Pa zahawm lo tawp pawh ni sela, a fanu pawhin a chawimawi loh ve hmel em bawk a nih saw! Sawti ringawt chuan fa in a pa a do ang a, Pa in a fa a do ngei ang. Eng emaw ngaihtuah thata siamthat tur an nei ve a nih ngei dawn saw,” tiin.

 

Thler lehlamah ve thung chuan Nu in, Mi nu, pawmlai nei ka nih hi...’tih tum eih lovin nula ai maha mawi leh itawm zawka thuam inbelin (inchei loh tur tihna lam a ni lo) kawtlai dung an lo fang hah hah mai hlawm bawk a.

 

Chu’ng nu hmeltha tak tak ka hmuh te zinga pakhat chu a incheina leh a thuam inbel atanga en ringawt chuan a zahawm vehvawh kher mai! Mahse, a bula awma a titi han ngaihthlak chuan maw, a zahawm na leh a mawina zawng zawng hliahkhuhtu a lo lang tlat pek a! Chu chu a thinlungin a lo pai reng thin alo lanchhuahna tawngkam zuamawm tak chu ani tlat thung.

 

Amah chuan fanu nulate pawh a nei ve lek lek tawh a, a fanute hnenah pawh thu tha tak tak a hrilh ve fova, thutak sawi a thiama a zawm lamah erawh a fate aiin a tuanfum hle thung ang lawi a!

 

A pasal lakah chhuanlam a ngahin, han vahchhuah lawkna tur lah hi a hre thei khawp a, a sawi pawimawh thiam em em zel lehnghal nen, han awihsak lo ngawt dawn se an pa tana rinhlelh ngaihna reng reng awm lo khawpin a lem thiamin lem a chang thiam em em mai bawk si a. Nu berin nuichung leh hlimsanga a tih tur tul sawi chu Pa tan pawh han awihsak loh phal chi lah a ni mawlh hek lo.

 

Chu chhuanlam thumawi tak chuan kawngkhar em pawh a dinhmun a nghehpui tak si lova’h chuan, kawngka pawn lama a khawsakphung thununsak chu khawilamah nula leh tleirawl zawk te ai mahin a zalenna chuan sual a hnaih zualtir a, sual a ngampatna hmunah chuan thlarau thianghlim tan pawha hnehtu ni tura lo beihpui chu a theih tawh bau si lo.

 

Zankhat chu, ka thiante nen kan thiannute dawr kawtah lenna tur hre lovin kan thukhawm tiai a. Kan zinga pakhat hian, “Kan thiana hian eng emaw kha han hmu ve se ka va han ti ve aw...?” a rawn ti a. Ka bula mite chuan hrethiam tih hriat tak hian, “Ni e, a tha tak ang a..!” tih pahin thawh an rual a. Khawdai deuha awm khualbuk pakhat lam pan chuan kan kal ta a.

 

Kan thlen chuan car var nalh tak pakhat hi a kawtah chuan a lo ding hnumhlarh a. A chhungah tumah an awm lo tih erawh a rim atang pawha chhui a ngai lem lo.

 

Khualbuk chhungah chuan lutin kan mi hmuh tur te nghah chhuanlamah eitur man tlawm chi ber chu kan lam a, dawhkan kan kil a kan titi melh melh bawk a.

 

Chutia kan titi lai chuan, inchung lam atangin rawn penthla ri deuh hnak hnak chu kan hre ta a. Thiante chuan, “Zanin a i thil hmuh hi zanin tut tutah a awmzia kan hrilhfiah dawn lo che a, a awmzia leh a dinhmun erawh Pathianniah Biak Inah i hre fiah mai ang.” an ti a.

 

Ke pen thawm chu a rawn hnai thla zel a. A tawpah chuan mipa kum 45 atanga 50 inkar tur awm, han en mai pawha pa zahawm leh sar vah mai, ‘ka pu’ tih hmasak phawt lohva biak mai pawh ngamawm lo tur khawp leh nula la upat hmel lo tak thlanin a bawhhuh ro lam la hnawng pawrchep hian an rawn lang dun hlawl mai a. Hmanhmawh tih hriat tak hian pawna an motor lam chu an panding dun nghal chat a.

 

Pawnah an chhuaha an inphurh liam leh hnu chuan ka thianpa chuan, “ A mipa zawk kha nupui fanau nei lai a ni a, a hmeichhia kha chu nula...”a han ti a, a bak a sawi zawm tawh lem lova.

 

Ka thilhmuh awmze hriat belh tura inkhawm chu ka chak ta et et mai a! Thlarau lam atanga tuina tel lova inkhawm chakna thinlung put tlat pawh hi thil tha lamah ka ngaih phah ta hial a! Dik tak maw???

 

Nu leh pa duhtak te u, nangmahni tuhrah ngeiah sual chu a ngampat phah a, in tu, in fate nun khawlo tak tak ngai thei lovin a chhia inkhawmtira in mawhchhiat leh thin hi chu in dik ber a rinawm chiah bik lo tawp a nia.

 

Chutihrual chuan thalaite pawh hian kan zalenna hi sual lamah i tlanpui lo teh ang u. Kan ram kan hnam mawina leh zahawmna humhimtu tluka hnam pasaltha tunge awm chuang ang le?

 

Kan zavai hian kan tisual theuh tawh a nih pawhin sual chu inhnehtir reng lovin, kan hma lam hunah tal hian eng i siam teh ang u. Pathianni a lo herchhuah chuan, Biak In lam chu ka pan ve ta ngei a.

 

Mikhual ka nih avangin tlarhnung lamah langsar lo takin ka inthiat pawr ve fap a. A rukin ka thil hmuh awmzia leh chhanna chu ka zawng reng bawk a.

 

Nakin deuhvah chuan, suit nalh leh manto tih hriat tak ha hian  ka hnunglam atangin ka thutna tlar  chu a rawn kal pel vuai a, a thliin a rawn beng zawnga rimtui tak leng chem chem pawh chu ka hre thei a.

 

Induhtawk leh intih zahawm tawk taka kun deuh ngak hian lamtual kal pelin Upa thutna tlar hnunglamah chuan a va inthiat tlezar a.

A tawngtai zo rawn dak chhuak chu ka han enchiang a, khualbuka nula nena thlan huh pawh ro hman lo khawpa hmanhmawha inphur haw leh ta a mipa zawk kha a lo ni reng mai a! “E heu! a va huai salh salh ve saw chu! A ngam ang ngam saw kan Zoram hian engzat nge kan neih ang aw? A fate thu tak tak zirtirtuah tangin, chhung inkhawm pawh a ngaih pawimawh hmel viau saw le!” tiin thinrim leh ngaihnepna thinlungin ka ngaihtuah a.

Author
Anonynous